நம்மூர் சார்லி சப்லின்கள்

                 

சிரிக்கக்கூடாதென நாம் உறுதியாயிருந்தும்

நமக்குச் சிரிப்பு மூட்டூகிறார்கள்

நம்மூர் சார்லி சப்லின்கள்

வேடிக்கை காட்டாமலே வகைவகையாய்ச் சிரிக்க

தொடர்ந்து வற்புறுத்துகிறார்கள்

நம்மிடமிருந்து அடிக்கடி எழுகிறது

ஒரு குபீர் சிரிப்பு

ஒரு வெடிச் சிரிப்பு

ஓர்  ஏளனச் சிரிப்பு

ஓர் அசட்டுச் சிரிப்பு

ஒரு புன்சிரிப்பு

கிச்சுமுச்சு மூட்டாமல்

உம்மனாமூஞ்சி காட்டுகிறார்கள்

தாடியைத் தடவியவாறு

தலையைச் சொறிந்தவாறு

மௌனத்தில் உறைந்த முகங்களோடு

எப்பொழுதும் யோசித்தவாறு நடமாடி

சிரிப்பு மூட்டுகிறார்கள்

மேடையில் பேசத் தயங்குகிறார்கள்

குறைவாகப் பேசுகிறார்கள்

தப்புத் தப்பாகப் பேசுகிறார்கள்

குழப்பமாகப் பேசுகிறார்கள்

பேச்சுக்கிடையே  வாய்விட்டுச் சிரிக்க

நமக்கு வாய்ப்பளிக்கிறார்கள்

பிரச்சினைப் புழுதியைக் கூட்டி

கம்பளத்திற்கு அடியில் தள்ளிவிட்டு

கைகளைத் துடைத்தவாறு

ஒண்ணும் இல்லிங்க.. எல்லாம் சரியாப் போகும்

பார்ப்போம்..சும்மா பேசுறாங்க

எனச் சமாளிக்கிறார்கள்

சிரிக்கும் நம்மைப் பார்த்து

அவர்களின் ஆதரவாளர்கள் முறைக்கிறார்கள்

சிரிக்கக்கூடாது எனக் கட்டளையிடுகிறார்கள்

சிரமப்பட்டுச் சிரிப்பை அடக்கிக்கொண்டு

நமக்குள் சிரிக்கிறோம்

சிரிக்கும் நம்மை

வெளியிலிருந்து யாரோ எட்டிப்பார்க்க

எங்கும் கேட்கிறது

ஒரு நையாண்டிச் சிரிப்பு

ஒரு கேவலச் சிரிப்பு

ஒரு நமட்டுச் சிரிப்பு