கடவுள் மீதான வன்முறைகள்

கூடிக்கொண்டே இருக்கின்றன
கடவுள் மீதான வன்முறைகள்

கழிவறைக் காகிதத்தில்
கடவுளின் பேரைக் கிறுக்கிக்கொண்டு
தனக்குத்தானே பேசிக்கொண்டிருந்தான் ஒருவன்

தலைதெறிக்க ஓடிவந்தவன்
கடவுள் தன்னைக் கொல்லப் பார்ப்பதாக
புகார் கூறினான்

தானறிந்த கடவுள்
இறந்து விட்டதாக ஒருவன்
தன்னிலை விளக்கம் தந்தான்

கடவுள் நல்ல கற்பனை என்று
கடவுள் மீது பின்னப்பட்ட சிந்தனைகளைக்
கலைத்துக்கொண்டிருந்தான் ஒருவன்

போரில் சிதிலமான கோயில் சிலைகளைப்
பூட்ஸ் காலால் உதைத்துச்
சிரித்துக்கொண்டிருந்தான் ஒருவன்

தான்தான் கடவுள் என்றும்
கடவுளின் அம்சம் தனக்கு உண்டென்றும்
மாயஜாலத்தில் நம்பச் செய்துகொண்டிருந்தான் ஒருவன்

எதையும் பொருட்படுத்தாமல்
நேர்த்திக் கடனை நிறைவேற்ற
ஒரு மனிதக்கூட்டமே
கோயிலை நோக்கிச் சஞ்சரித்துக்கொண்டிருந்தது