ஆவிகள் உலவும் படுக்கையறை

தலையணையில் முகம் புதைத்து

தூக்கத்தின் பிடியில்
கொஞ்சம் கொஞ்சமாக எனையிழந்த
நடுநிசியின் ஏதாவது தருணங்களில்
அவற்றின் ஆட்டமும் அட்டகாசமும்
தொடங்கிவிட
படுக்கையோடு எனைத் தவிக்கவிட்டுத்
தூக்கம் தூரப்போகிறது
முகம் மூடிய விரல்களின் இடுக்குகளில்
பயக்கண்களால் துழாவுகிறேன்
தலைவிரிக் கோலத்தில்
ரத்தம் வழியும் கோரப் பற்கள்
பார்க்கச் சகியாத சிதைந்த முகங்கள்
உயிர் பிடுங்கியெறிய நீளும்
நீள்நகம் முளைத்த விரல்கள்
ஒவ்வொன்றாய் முளைக்கின்றன
கட்டிலின் கீழேயிருந்து
பின்னாலிருந்து
மேலிருந்து
இருள் அப்பிய அறையின்
எல்லா முடுக்கிலிருந்தும்

எல்லா முகங்களிலும் ஒட்டியிருக்கின்றன
நாளிதழிகளில் வண்ணத்தில்
சிதைந்திருந்த முகங்களின்
தொலைக்காட்சி மர்மத் தொடர்களில் தோன்றிய
கோர முகங்களின்
தடயங்கள்.. தடயங்கள்