பயணிகள் கவனிக்கவும்

கண்களிலும் இதயத்திலும் ஆவலைத் தேக்கி

அந்தப் புராதன கட்டடத்தினுள் நுழைகிறீர்கள்
சுவர்களில் பதிந்திருக்கும்
தொன்மை ஓவியங்களின் சிற்பங்களின்
கலைநேர்த்தி வியந்து
வரலாற்றுப் பக்கங்களில் நுழைந்து
கொஞ்சம் வாழ்ந்து பார்க்கிறீர்கள்

பயணக்கட்டுரைக்குப் பயன்படுத்த ஆனமட்டும்

சில குறிப்புகளைச் சேகரிக்கிறீர்கள்

நினைவில் நிலைக்க
குழுவாய் நின்று உங்கள் வருகையைக்
கேமராவில் பதிவு செய்கிறீர்கள்

திரும்புகிறீர்கள்

வாசலில் கைவினைப் பொருள்களோடும்

சுற்றுலா வழிகாட்டி நூலோடும்
உங்களை நோக்கி ஏக்கமாய்க் காத்திருக்கும்

ஏழைச் சிறார்களின் பார்வையைச்

சாதூரியமாய்த் தவிர்த்து வெளியேறுகிறீர்கள்

ஆக்கம்: ந.பச்சைபாலன்
மலேசியா
நன்றி: அநங்கம் டிசம்பர் இதழ்